انصار: (د تله ۲۷مه)، ستره محکمه وايي، خوست کې اتو کسانو ته د رشوت، جعلکارۍ او فریبکارۍ په جرم په عام محضر کې تعزیري سزا ورکړل شوې ده.
سترې محکمې په یوه خبرپاڼه کې ویلي، د خوست ولایت د ښاري ابتدائیه محکمې د عامه امنيت دېوان د پرېکړې په اساس اتو کسانو ته د رشوت، جعلکارۍ او فریبکارۍ په جرم په عام محضر کې تعزیري سزا ورکړل شوه.
په خبرپاڼه کې راغلي، ابتدائيه محکمې د یادو کسانو له ډلې شپږ مجرمين پر یوه ـ یوه کال تنفیذي بند او ۳۵ ـ ۳۵ دُرو تعزیري سزا، اووم مجرم پر دوه کاله تنفیذي بند او ۳۹ دُرو تعزیري سزا او وروستی مجرم پر یوه کال تنفیذي بند او ۳۵ دُرو تعزیري سزا محکوم کړی و.
د تعزیري سزا د تطبيق په موخه جوړه شوې غونډه کې د مرافعه محکمې د جزا دېوان رئیس مولوي محمد مدني، د ښاري ابتدائيه محکمې رئیس مولوي نقیب الله ذاکر، قضائي او نظامي منسوبینو او عام هېوادوالو ګډون درلود.
یاد حکم د سترې محکمې د عالي مقام له تائید وروسته پر مجرمينو تطبیق شو.
دا په داسې حال کې ده چې وروستیو ورځو کې له مختلفو ولایتونو څخه د تعزیري سزا د حکم د تطبیق خبرونه ورکول کیږي.
URL تعقيب: https://www.ansarpress.com/pashto/33961
د فرشتې کوهستاني او د هغه د ورور مړي خاورو ته وسپار شول